Á þingvöllum, nánar tiltekið í landi Miðfells við austurhluta Þingvallavatns, keypti afi Karls Óskars, Óskar, land fyrir um 40 árum. Þar byggði hann sumarbústað sem fjölskyldan hefur sterkar taugar til.

Landið er gróið hraun, lítill jarðvegur, víða er hraunið mosavaxið en þar þrífast líka lyngplöntur, birki og grávíðir. í góðu árferði vex mikið af krækiberjum og bláberjum í landinu. Karl kynntist skógrækt þarna í gegn um eiginmann móðursystur sinnar, hennar Ninnu. Aðalsteinn hét maður hennar og gróðursetti hann t.d. furur í landinu sem hafa þrifist vel. Síðan hafa verið gróðursett birkitré, viðja, reynir, lerki.

Seinni árin hafa fleiri tré bæst hópinn eins og alpareynir, baunatré; runnar eins og blátoppur og japanskvistur. Reynt hefur verið að rækta þarna alaskavíðir en hann virðist ekki ná sér á strik í þessum jarðvegi.

Karl kom sér upp uppeldisreit í landinu fyrir um fimmtán árum. Pottaplöntur hafa verið fluttar til og frá staðnum.

Árið 2007 fór ég að koma meir að málum í Þingvallalandinu. Þá fórum við Karl í það að sortera upp úr uppeldisreitnum, sem hafði lítið verið sinnt undanfarin ár. Þó nokkuð var til af baunatrjám sem Karl hafði ræktað upp af fræjum sem hann hafði fengið sent frá frænku sinni í Kanada. Trén voru búin að vera um 10 ár í pottum svo það var löngu tímabært að fara að koma þeim í jörð. Við ætluðum að fara með nokkrar plöntur til gróðursetningar í Hróarsholtið en það urðu svo um 90 plötur. Uppeldisreiturinn hafði því að geyma miklu fleiri plöntur en Karl hafði átt von á. Þær sem ekki voru gróðursettar voru pottaðar í stærri potta og nýja mold.

Plöntur sem við komum til í Stjörnugrófinni höfum við svo flutt yfir í uppeldisreitinn á Þingvöllum þegar þær eru orðnar um tveggja ára gamlar. Þar eru þær svo hafðar í tvo til þrjú ár til viðbótar meðan þær eru að stækka og styrkja rótarkerfið sitt án samkeppni við aðrar plöntur í náttúrunni. Með því að gefa þeim það forskot eru þær fljótari til og eiga meiri lífslíkur úti í náttúrunni.

Það er endalaus pæling hvað eigi að planta mikið út í hið náttúrulega umhverfi Þingvalla. Þetta er auðvitað mál vegna nálægðar við þjóðgarðinn á Þingvöllum þar sem menn sækja um að fá þjóðgarðinn settan á mynjaskrá UNESCO. Skilyrði fyrir þeirri samþykkt er að staðurinn sé í sinni upprunalegustu/náttúrulegustu mynd.

Hvað er upprunalegur/náttúrulegur skógur á Íslandi? Fyrir þá sem hafa áhuga á að fræðast eitthvað um fyrirbærið geta t.d. lesið greinina Íslands fornu skógar í Skógræktarriti Skógræktarfélags Íslands frá 2008, 2.tbl..